Menu
Mælkebøttecenteri Najugaqatigiiffimmik nutaamik ammaassaaq, Najugaqatigiiffik Aili 0-3-nut ukiulinnut tulluarsagaq. Inooqataanikkut pamersaanikkullu inissiinissamut neqeroorutaavoq katsorsarneqarnissamullu periarfissaqassalluni.
Kalaallit Nunaanni sumiginnaanermik ajornartorsiuteqarneq annertusiartorlunilu ersarissiartorpoq, tamannalu pissutigalugu meerarpassuit inuusuttuararpassuillu angerlarsimaffiup avataanut ulloq unnuarlu paaqqinnittarfinnut imaluunniit angajoqqaarsianut inissinneqartarput. Meeqqap inuunerani kingusippallaartukkut angerlarsimaffiup avataanut inissiisarneq pikulasarpoq. Tamatumunnga ilaatigut pissutaapput meeraaqqanut inissiivissanik paaqqinnittarfinnik naammattunik peqannginnera, aammalu Kalaallit Nunaanni angajoqqaarsianik amigaateqartoqartarnera. Tamassuma malitsigaa meeqqat ineriartornermikkut atugarissaarnermikkullu annertuunik ajornartorsiuteqalereersimallutik inissinneqartarmata.
Aili 0-3-nik ukiulinnut najugaqatigiiffissaq pilersinneqassaaq tassanilu meeqqat inuuniarnermikkut tarnimikkullu paasiniaavigineqartassapput. Ailimi meeqqaat sivisunerusumik inissinneqarnissaminnut periarfissaqassapput, tamannalu pisassaaq angajoqqaajusut pisinnaatinnagit imaluunniit angajoqqaarsiassaannik nassaartoqarsimatinnagu.
Meeqqanik paasiniaanerup saniatigut suliniummi neqeroorutaassaaq angajoqqaat inuuniarnermikkut ajornartorsiortut angajoqqaatut pisinnaasaannik paasiniaaffigisarnissaat, kiisalu angajoqqaat tunngavimmikkut ineriartorsinnaagunik piukkunnarsarneqartassallutik. Kalaallit Nunaanni 0-3-nut ukiullit ilaqutaasullu inuuniarnermikkut ajornartorsiortut siusissukkut suliniutiginiarlugit ulloq unnuarlu paaqqinnittarfiusussaavoq.
Siusissukkut suliniuteqarnissaq pineqarpoq, tassanilu meeqqap ilaquttaminut imaluunniit angajoqqaarsiassaminut alloriaqqinnissaa ilanngunnissaalu ilaqutariinnik siunnersuisumik ilaqarluni qulakkeerniarneqartassaaq. Alloriarneq Ailimit kommunimillu inissiisumit suliatigut piginnaanilinnik ikorfartorteqarluni pisassaaq, taamaalilluni meeqqap angerlarsimaffittaassaminut pinermini ineriartornera, atugarissaarnera kinaassusaalu ikorfartorneqassaaq. Tassani Mælkebøttecenterip kissaatigaa ullumikkutut meeqqat amerlasuut assigiinngitsunik arlalinnik inissinneqartarnerminnik misigisaqartarunnaassasut.
Meeqqat allanut atassuteqarsinnaanertik attaveqarsinnaanertillu ineriartortittussaavaat, inuuniarnikkut tarnikkullu meeraq avatangiiseqarluni pisariaqartitaminik pisarnissaa pingaartinneqassaaq.
