Mælkebøttecenterimi ornittagaq internetcaféqarpoq, sammisaqartarfimmik sulliveqarpoq, tassani titartaasoqarsinnaavoq, sapangaaqqanik suliaqartoqarluni, pinnersaasiorluni mersorlunilu. Taakku saniatigut aamma igaffeqarpoq nerisassiortartumillu sulisoqarluni.
Taakku saniatigut aamma inersuaqarpoq timigissartarfimmik, bordtennissertarfimmik aamma isiginnaartitsisarfimmik. Tassani inersimasoqartarpoq timikkut tarnikkullu najuuttussamik, taanna oqalunnissaminut, tusarnaarnissaminut nuannisaqataanissaminullu piffissaqartarpoq.
Sammisaqartitsinerni assigiinngitsuni immikkut pisariaqartitat isiginiarneqartarput (qanilaarneq, isumassuineq, aaqqissuussamik ingerlaaseqarneq, siumut nalunanngeriissuseqarneq, tutsuiginassuseq, tatiginassuseq, tusarnaarsinnaaneq), taakkulu meeqqanit sumiginnarneqarsimasunit sumiginnarneqarsimanngitsunillu tamanit naammattoorneqarsinnaapput. Meeqqat nukissaqarluartut Ornittakkamukartartut ataatsimooqatigiinnermi ilaasarput – taakkulu ilaatigut takusinnaassavaat meeqqat tamarmik ajunngitsumik inuuneqartanngitsut, aammalu paasisinnaalissallugu inuuniarnikkut atugarliortunut qajassuussisarnissaq ikinngutaalluarnerullu iluaqutaasarnera. Ornittakkami aamma illu qimallugu assigiinngitsunik sammisaqartoqartarpoq, soorlu naluttarfiliarnerit, sikkileriarnerit, nunamut pisuttuarnerit, aalisariarnerit kiisalu nuniagiarnerit.
