Menu
Mælkebøttecenterimi ulluinnarni pamersaanikkut sulinermi Meeqqat isiginnittaasiannit isumassarsiat ingerlaavartumik atuutsilerniarlugit ulluinnarni sulinermi Eqqarsaatersoqqissaarneq atorneqartarpoq.
Taaguut Eqqarsaatersoqqissaarneq tarnit pissusaannik ilisimatusarnermit tunngaveqarpoq, ullumikkullu pamersaanerup iluaniillualernikuuvoq. Eqqarsaatersoqqissaarsinnaanermi nammineq allallu eqqarsaatikkut qanoq innerat isiginiarneqartarput. Eqqarsaatikkut qanoq issutsit tassaasinnaapput misigissutsit, eqqarsaatit, pisariaqartitat, anguniakkat peqqutaasullu.
Taamaattumik ulluinnarni pamersaanikkut suliaqarnermi sulisut meeqqallu eqqarsaatikkut qanoq issusaat isiginiarneqartarput. Meeqqat isiginnittariaasianni sulisut meeqqap inissisimaffianut taassumalu isiginninneranut inissinniarsarisarneq qitiusarpoq.
Meeqqat sumiginnarneqarsimasut eqqarsaatersorluarsinnaanermikkut ajornartorsiuteqartarput. Tamanna meeqqap isumassuisunik aalaakkaasunik amigaateqarsimaneranik pissuteqarsinnaavoq, meeqqallu misigissusaannik pisariaqartitaannillu takunnissinnaasimanatik taakkulu tarrarsorfigisinnaasimanagit. Tarrarsortarneq taanna amigaataasimagaangat meeqqat namminneq misigissutsiminnik eqqarsaatiminnillu ilisarsisinnaanertik ajornartorsiutigisarpaat. Meeqqat misigissutsitik eqqarsaatitillu ilisimanngikkaangamikkit allat taakkunatigut pigisaat takullugillu ilinniarnissaat sapersaatigisarpaat. Taamaattumik meeqqat amerlasuut eqqarsaatit misigissutsillu ataqatigiinnerisa aammalu iliuutsit paasinissaat amigaatigisarpaat.
Pamersaanermi periuseq taaguummik eqqarsaatersoqqissaarnermik tunngaveqarpoq, tassanilu sulisup suleqatimi meeqqallu sullitami eqqarsaatikkut qanoq innerannik alapernaassinnaanerat paasinnissinnaanerallu pingaartinneqartarpoq. Sulisup meeqqap iliuusaasa tunuinniittut aammalu eqqarsaatikkut inissisimaffii takuniarsarisartussaavai. Ilutigalugu sulisup nammineq eqqarsaatimigut qanoq innini taamallu meeqqanik sunniisinnaanini eqqumaffigissavaa. Assersuutigalugu sulisut meeqqap nukillalaartarnerinnit sunnertissinnaavoq, taamallu meeqqap eqqarsaqatiginissaannik ajornartorsiuteqarluni. Taamaattoqartillugu sulisoq qamuuna nammineq qanoq innerminik eqqumaffilik pamersaanikkut suliaqarnermini qanoq issutsit akornusiisarnerinik paasinninnerulissaaq.
Sulisut alapernaattuutillugit, meeqqallu eqqarsaatikkut qanoq innerat paasiniarsarisarunikkit, taakkulu pillugit meeraq oqaloqatigisarpassuk taava meeqqap arriitsumik eqqarsaatersorluaqqissaarneq ilinnialersinnaavaa. Assersuut tassaasinnaavoq niviarsiaraq sapaatip-akunnerata naanerani anaanaminik ilagisaqartussaq. Tallimanngorninngormat anaanaasoq sianerpoq aalakuulersimagami naapinnissartik unitsillugu. Niviarsiaraq arpaannaq ineeqqaminukarpoq taqqamanilu pisattaminik aserortererpalulerluni. Sulisut niviarsiaraq oqalussinnaasutut nalileriaramikku oqaloqatigaat, uanilu niviarsiaqqap anaanami imeqqinnera pillugu pakatsinera kamanneralu oqaasertalerlugu paasinninnerminnik ersersitsipput. Sulisut aamma oqaasertalerpaat qamani timimi kamanneq imak annertutigisinnaasartoq allaat ilaatigut pisattanik aserortererusunnarsisarluni. Sulisup niviarsiaraq taamak misigisimanersoq apersullattaavaa. Taamak pisoqartillugu pingaaruteqarpoq sulisut misiginneqatiginninnerminnik takutitsisarnissaat meeqqallu qanoq issusaannik alapernaattuunissaat, uani sulisut namminneq paasinninnertik meeqqap paasinninneratut ittuaannanngitsoq ammaffigisariaqarpaattaaq.
Paasinninneq pingaaruteqarpoq meeqqallu meeraqatiminnut inersimasunullu allanut attaveqarsinnaanerinnut tunngaviliisussaavoq. Meeqqap tunngaviusumik nammineq allallu eqqarsaatimikkut qanoq issusaannik paasinnissinnaanerat ineriartussaaq namminerlu misigissutsit peqqinnartut pillugit paasinnissinnaanera ineriartulissalluni. Ulluinnarni Mælkebøttecenterimi sulinermi eqqarsaatersuutiginnilluarnermik meeqqallu isiginnittaasiannik suliaqartarnerit malitseqartinneqartarput meeqqanut ataasiakkaanut peqqissaasarnerit pilersaarusiortarnerannik, aammalu sulisut supervisionertittarnerannik.