Aasami angalaneq ilaannut allanit pingaaruteqarnerusarpoq

Qujanartumik Polar Seafoodip tunissuteqarneratigut meeqqat inuusuttullu Mælkebøttecenterimeersut arlallit, Danmarkimi pingaarutilimmik aasarsiorsinnaalerput. Taakkununnga aasarsioriarneq aasarsioriarnerinnaanngilaq tassaallunili perorsarneqarnermi sakkussaq pingaaruteqartoq.

Avatangiisini takornartani misigisat nutaat isumassarsinartullu meeqqap imminut naleqartinneranut qaffassaataasarput aamma inunnut allanut attaveqarsinnaanermut ikinngutigiinnermullu iluaqqutaallutik. Tamanna aqqutigalugu nammineq piginnaaneqarnermik upperisaqarneq sanarfineqartarpoq, tassaalluni Mælkebøttecenterimi meeqqat inuusuttullu ineriartornerannik atugarissaarnerannillu suliniarnermi perorsaanermi naleqartitat pingaarnerit ilaat. Tassa aasarsioriarluni angalaneq aaqqissuulluagaq meeqqat inuusuttullu inooqatigiinnermi ineriartornerannut nukittorsaaqataavoq, atuarfinni pitsaanerusumik angusaqarnissaannut. Tamanna pillugu Polar Seafoodimit tunissut perorsaanermi inooqatigiinnermilu sakkussamik nukittorsaataavoq annertooq.

”Meeqqat inuusuttullu atugarliortut ineriartornissaannut periarfissaasa nukittorsaavigineqarnissaat pingaartittorujussuuarput”, Miki Brøns, Polar Seafoodimeersoq oqarpoq. ”Aasarsioriarluni angalaarneq imartooq inooqatigiinnermi immikkoortitaanermik meeqqat inuusuttullu pineqartut misigisartagaannik atorunnaarsitseqataasarpoq, taamaattumik suliniut taanna uagut tapersersorusussimavarput. Nuannaarutigaarput aningaasanik tapiissuteqarnerput aqqutigalugu meeqqat inuusuttullu ilaat nutaanik misigisaqartinnerisigut isumassarsitissinnaagatsigit, taamaaliornikkullu ineriartornerannut pisariaqartitaannik tapertaasinnaagatta. Aningaasanik tunissuteqarnerput aamma tassaavoq Mælkebøttecenterip suliaanut angisuumut pingaartorujussuarmullu tapersersuutitut isigineqartariaqartoq”, Miki Brøns oqarpoq.

Donation-fra-PS

Kirsten Ørgaard, Mælkebøttecenterimi pisortaq oqarpoq: ”Meeqqanik aasarsiortitsisarnernut atatillugu Mælkebøttecenterimit isiginiarneqartartut misilittakkallu ilaat tassaapput, meeqqat nuannaarnerulertarnerat, kulturinik allanik naapitsisimallutik qaammaasaqarnerulersarnerat aamma attaveqarfinnik ikinngutigiinnernillu nutaanik peqalersarnerat. Ilaatigut meeqqanik najugaqatigisaminnut aammali ilaatigut inersimasunut angalaqataasunut. Angerlamut uteraangamik ulluinnaat unammillerfiusussat aqqusaarnissaannut nukissaqarnerulersarput eqqaamasaminnillu avitseqatigiittarlutik. ”Eqqaamaviuk”, nipi taanna akuttunngitsumik tusarsaasarpoq. Nalunngilarput aasarsioriarluni angalasarnerit qanoq isumatutigisut, taamaattumik Polar Seafoodip tapersersuinerat qutsatigaarput”, Kirsten Ørgaard.


Meeqqat aasarsioriarlutik misigisaqartinnerat arlalinnik siunertaqarpoq

Meeqqat allat peqatigalugit aasarsioriartussanngoraamik  qilanaarisaqarnermik misigisarput. Aallarnissaq sioqqullugu meeqqat pilersaarusiornermut peqataatinneqartarput, angalanissami misigisassat ilisimasaqarfigilersaramikkit. Siunissamut anguniagassanik inissitsiterineq ilinniartarpaat, aamma piuvusunngortinneqarnerat.

Kalaallit Nunaata avataani nunami allami misigisassarsiorneq aamma kulturimik allamik naapitsineq ilisimasanik paasisanillu nuttaanik peqalersitsisarpoq. Meeqqat inuusuttullu atugarliortut tassaagajupput kiserliortut qanigisaminnik ikinnguteqanngitsut. Inooqatigiinnermi attaveqarfinnik nutaanik peqalernissaminnut pisariaqartitsipput, taamaattullu ataavartumik ikinnguteqalernermut pingaaruteqarput.

Meeqqat ataasiakkaat aamma inersimasut peqataasut akornanni attaveqarneq pitsaanerulersarpoq, ataatsimoorlutik misigisaqaqatigiikkaangamik, aamma peqatigiinneq taamaattoq inersimasunut tatiginninnerulernermik pilersitseqataasarpoq. Meeqqat angerlarsimaffiup avataanut inissinneqarsimasut ataqatigiinnerat nukittorsarneqartarpoq, ikinngutigiilernissamut periarfissinneqartaramik ataatsimoorlutillu eqqaamasassanik tunneqartaramik. Ataqatigiinnerit taamaattut meeqqat imminnut tatiginerulernerannut ilapittuutaapput.

Annermik paasisaqarusunnermi attavissat:
Miki Brøns, Polar Seafood oqa. + 299 383101 - This email address is being protected from spambots. You need JavaScript enabled to view it.
Kirsten Ørgaard, Mælkebøttecentret oqa. +299 597439.