Mælkebøttecenteri imminut pigisuuvoq ukuninngalu immikkoortortaqarluni:

  • Mælkebøtti
  • Ilasiaq
  • Allu, aammalu 
  • Allaffeqarfik

Billede1

Tunuliaqutaq

Kalaallit Nunaanni Sulisitsisut Peqatigiiffiata 2002-mi ukialernerani kissaatigisimavaa inuiaqatigiinni akissussaaffimmik suliniutitigut meeqqat inuusuttuaqqallu sumiginnakkat atugarisaannik pitsanngorsaatinut kivitseqataanerusariaqarlutik. 
 
Ajornartorsiutip annetussusaa missingersorniarlugu Sulisitsisut misissuineq “ Børn og Unge i Poilitiets Rapporter- Hvem og hvorfor? ” (Meeqqat Inuusuttullu politiit nalunaarsuiffiani nalunaarsukkat- Kikkuuppat aamma sooq?) suliaritippaat, tassungalu siunertaasimavoq suliniutissat sinaakkusersornissaat pilersaarusiornissaallu. Misissuinerup takutippaa, Nuummi meeqqat inuusuttullu qassit 0-it 17-illu akornanni ukiullit, 2002-mi 2003-milu politiinut arlaatigut nalunaarsorneqarsimanersut,  pinerluttuliorfigineqartutut, pinerluttuliortuusutut allatulluunniit pinerlunnermut akuusutut/attuumassuteqartutut nalunaarsorsimanersut. Ukiut taakku marluk ingerlaneranni meeqqat 1075-it nalunaarsorneqarsimapput (apeqqutaatinnagu qasseria ilaasimanersut, meeraq ataaseq ataaseria kisitsimmi ilaavoq arlaleriarluniluunniit nalunaarsorneqarsimagaluaruni). 
 
Meeqqat inuusuttuaqqallu taakkua nalunaarsukkat 3,5 procentii sakkkortuumik sumiginnagaapput, inuttut tarnikkullu annertuumik ikilerneqarsimallutik, 8 procentiilu annikinnerusumik sumiginnagaasimallutik. Meeqqat taakkua tassaapput Mælkebøttecenterimi sullinniakkagut. 
 
Misissuineq tunuliaqutaralugu  Sulisitsisut ataatsimiisitsillutillu suliamut ilisimasaqarlutillu suliaqartuusunut sammisaqartitsipput. Tassanilu Nuummi Meeqqat Inuusuttullu Illutaarnissaanik isuma pilersinneqarpoq. Taassuma kingorna Red Barnet, Nuuk Rotary Klub, Lions Club aammalu Kalaallit Nunaanni Sulisitsisut Peqatigiiffiat ataatsimoorlutik aningaasaliinissamut suleqatigiilerput. Martsimilu 2006-mi Meeqqat Inuusuttullu Illuat Mælkebøtten (Inneruulaq) ammarneqarpoq. 
 
Meeqqat Inuusuttullu illuat Mælkebøtti tassaavoq meeqqat inuusuttuaqqallu Nuummi oqqisimaarfiat, tassanilu siunertat ilagaat meeqqat inuusuttuaqqallu sumiginnakkat atugarisaasa oqilisaaffigineqarnissaat, sumiginnagaaneq taamaalilluni annikillisinneqassammat. 
 
Mælkebøttip ammarnerata kingorna Ilasiaq (2012-mi) aamma Allu (2014), ammarput.