2006-imili Mælkebøttecentret ammarmat, maluginiarsimavarput, meeqqat inuusuttullu Mælkebøttecenterip angerlarsimaffiutaanni najugaqartut katsorsartariaqarnerat annertusiartuinnartoq. Meeqqat inuusuttuaqqallu taakku avatangiisini meeqqanut tulluutinngitsuni akuusuupput, tamannalu meeqqat ineriartorneranut innarliisarpoq. Arlalippassuartigut meeqqat inersimasunik attaveqanngitsuusarput aqqusinermilu “inuusuusarlutik”, meeqqat allat taamatut inissisimasut ilagalugit. Meeqqat annertuumik inuttut eqqarsartariaatsikkullu innarlerneqarsimasarput, Mælkebøttimiik qimaagajullutik aanngajaarniutinillu atuiffiusunut qanittuullutik. Tassanilu atornerlunneqarnissaminnut qaninnerusarput.

Meeqqat taakku killilerneqaraangamik piumaffigineqaraangamillu sakkortuumik qisuariartarput. Meeqqat taamatut atugallit avatangiisiminniit avatangiisinut allamut eqqissinartumut inersimasunillu isumassorneqarfiusumut katsorsaatigalugu nuunneqarlutik ilaatigut iluaqutigisarpaat. Tamanna tunngavigalugu qangalili nunaqarfimmi Kapisilinni illutaarnissarput kissaatigisarsimavarput. Nunatsinnimi avatangiiserput katsorsarfiginissaanut tulluulluinnarmat, perorsaanerullu tungaatigut meeqqanut eqqissiviittunut sullissinissamut tulluulluinnarmat. Meeqqat eqqissiviitsut taamaalillutik ulluinnartik allanngortissinnaammassuk.

Taamatut sullissinermi sullinniakkat tassaapput meeqqat inuusuttullu 3-niit 17-nut ukiullit Mælkebøttimi, Ilasiami Allumilu inissinneqartartut, avatangiisinullu allamut nuunneqarnissaminnut atorfissaqartitsisut. Meeqqat piffissamik killilikkami aalajangiussamilu Kapisilinneeqatigineqartarput.

Katsorsaasarnerup saniatigut illu meeqqanut inuusuttuaqqanullu immikkoortortaqarfitsinni najugaqartunut, meeqqanullu ornittagaatitsinnut orniguttartunut feeriartarfittut atorneqartarpoq. Illu meeqqanut arfineq pingasunut inersimasunullu marlunnut inissaqarpoq.